Abashinze Ejo Labs bashimiwe mu muhango wo kwizihiza Umuganura mu Ubudage, Berlin

Mu birori by'Umuganura byahuje Abanyarwanda, inshuti z'u Rwanda n'abafatanyabikorwa i Berlin, abashinze Ejo Labs bashimiwe umusanzu wabo mu burezi n'ikoranabuhanga.

Ku wa Gatandatu, tariki ya 8 Kanama 2026, Abanyarwanda batuye mu Budage, inshuti z'u Rwanda ndetse n'abafatanyabikorwa bahuriye i Berlin mu kwizihiza Umuganura. Wabaye umwanya wo gusangira ibyishimo, kuzirikana ibyagezweho, no gushimira abantu n'imiryango ikomeje gutanga umusanzu mu iterambere ry'umuryango nyarwanda.

Umuganura ni umunsi mukuru w'ingenzi mu muco w'u Rwanda, usanzwe wizihizwa ku wa Gatanu wa mbere w'ukwezi kwa Kanama. Uyu munsi uhuza igitekerezo cyo kwishimira umusaruro, gusangira, no kureba hamwe ibyagezweho mu ngeri zinyuranye z'ubuzima. Muri uyu mwaka, ibiganiro n'ubusabane byagarutse no ku musaruro uva mu bumenyi, uburezi, ikoranabuhanga, n'ubufatanye hagati y'abari mu Rwanda n'abari muri diaspora.

Muri uwo muhango, hashimiwe Abanyarwanda bagize uruhare rugaragara mu guteza imbere umuryango mu nzego zitandukanye. Mu rwego rw'uburezi n'ikoranabuhanga, hashimiwe Bosco Kalinijabo na Protogene Hahirwabayo, bashinze Ejo Labs.

H.E. Ambasaderi w'u Rwanda mu Budage, Igor Cesar, ashyikiriza Bosco Kalinijabo ishimwe, umwe mu abashinze Ejo Labs.

Iri shimwe ryagaragaje akamaro k'umurongo Ejo Labs yahisemo, ni kubaka ibisubizo by'ikoranabuhanga bigera ku bavuga Ikinyarwanda kandi bikabafasha gukoresha amahirwe ya AI mu rurimi bumva neza. Muri ibyo bisubizo harimo EjoChat, porogaramu ifasha abantu kuganira n'ubwenge buhangano mu Kinyarwanda.

Bosco Kalinijabo, umwe mu abashinze Ejo Labs akaba na CTO, yashimiwe umusanzu we mu burezi n'ikoranabuhanga.

Ejo Labs kandi iri gushyira imbaraga mu burezi binyuze muri Summer Talent Program 2026, gahunda y'ibyumweru bitanu igenewe abanyeshuri bo muri high school na kaminuza. Iyi gahunda ibafasha kumva ikoranabuhanga rigezweho, kurikoresha mu gukemura ibibazo bifatika, no kubaka ubushobozi bushobora kubyara umusaruro mu buzima bwabo no mu muryango mugari. Ikoranwa n'abafatanyabikorwa bo mu nzego za leta n'abikorera.

Icyemezo cy'ishimwe cya Protogene Hahirwabayo, umuyobozi akaba mu abashinze Ejo Labs.

Ikindi cyaranze uyu munsi ni ubusabane n'ubumenyi ku muco. Abitabiriye bagize umwanya wo kwidagadura, kuganira, no kwigira hamwe binyuze mu bisakuzo n'ibibazo by'ubumenyi rusange ku Muganura. Ibyo byatumye umunsi utaba umuhango wo kwibuka gusa, ahubwo uba n'umwanya wo guhererekanya ubumenyi hagati y'abakuru, urubyiruko, n'inshuti z'u Rwanda.

Kuri Ejo Labs, iri shimwe ni ikimenyetso cy'icyizere n'inshingano. Ridutera imbaraga zo gukomeza gukora ibisubizo bifitiye akamaro abavuga Ikinyarwanda, by'umwihariko aho ikoranabuhanga rishobora gufasha abantu kubona ubumenyi, serivisi, n'amahirwe mu buryo bubegereye.

H.E. Ambasaderi ageza ijambo ku bitabiriye Umuganura i Berlin.

Ejo Labs irashimira Ambasade y'u Rwanda mu Budage ku gushyigikira ibikorwa by'umuryango nyarwanda no kuzirikana uruhare rw'abawukorera. Turashimira kandi buri wese ukomeje gushyigikira urugendo rwo kubaka ikoranabuhanga rishingiye ku ndangagaciro, ku rurimi, no ku bumenyi bugera kuri benshi.